3 YONI
Yoni'a napa tali avo'mo Gaiyasife'mo kae'niye. Gaiyasi'a Kalisitini vaya'mo alagepa huno hapa mae'niya'mofe'mo Yoni'a hao ke heteno mago vekamo agi'amo Naiyotelefisi'a hosu kava'mo nehiye, huno huteno mani avo'mo kae'niye.3 John
Yoni'a napa tali avo'mo kae'niya gemae
1Nagaemo Goti vaya'ale'mo yagai'na ne'apatova vayatama vekamo Yoni'namo lama gelefe'mo nahau nayamopafi'mo nahau'niya Gaiyasigae'mo mani avo'mo nekaove. 2Nahau'niya ve'nimogae, hu'na, Kagupi mafa'nekamo'a alagepa huno ne'maiya kava huno kagufamo'mo alagepa huno hanesigeno ali'yakamo'mo alagepa huno afole aisiyafe'mo nunumu hu'na nekatove. 3Mago konagatimogi e'a, lama gelegamo alagepa huno ne'maiye, hu'a kava gemo naha pai'nage'na afite'nae'mo namogaga ai'nove. Age'novana lama gemo alagepa huka akame nehane. 4Mafa'ne anaga'nimogi, lama gemo alagepa hu'a akame nehae, hu'a apava gemo naha pai'nage'na afite'nae'mo namogaga ne'auva kava'nimo'a alu yafe'mo namogaga ne'auva kava'mo alagi ago aeno agase'niye.Gaiyasi'a alagepa ali'ya'mo ali'niya gemae
5Nahau'niya ve'nimogae, hu'na, kagaemo konagatimogimo alagepa huka hapa maege nata vaya'mo alagepa huka hapa maege nehana kava'mo alagepa ali'ya'mo ne'aline. 6Ani nata vaya'mogi siosi vaya'aitegamo nehana kavafe'mo, alagepa kava'mo nehiye, hu'a hu'nae. Kagaemo Goti'a ala agi'amo alisiyafe'mo kate'mo u'e'a hisaya vaya'mo hapa maesanana kanale kava'mo hugane. 7Apakaemo agi'ale'mo ali'a asaga hu'a atesayafe'mo Goti ali'ya'amo alisayafe'mo u'nae. Malaga vaya'ai apayapati'mo mago ya'mo o'ali'nae. 8Lagaemo ani agufa vaya'mo hapa maesunageno lama ge'amo afole aisiyafe'mo apakae'e'mo magokepi lokaeta ali'ya'mo aligetao.Naiyotelefisi'a hosu kava'mo hu'niya gemae
9Nagaemo siosilefe'mo mani avo'mo kae'novana Naiyotelefisi'a hogote vekamo maisiyafe'mo hau'nigeno ge'nimo no'afiye. 10Ani kava nehiya'mofe'mo siosilegamo visuva afina'mo hu'niya kavafe'mo, afa geleti'mo alino faipa huno late'niye, hu'na ae'na hakalo huguve. Ani kava huteno'ae'mo mago'e kava'mo nehiyana konaga vayatimo alino falu fala huno o'apateno ali'a falu fala hu'a apategefe nehaya vaya'mo apatafauno apateteno siosi vayapati'mo alino hapafaino ne'apatale. 11Nahau'niya ve'nimogae, hu'na, hosu kava'mo akame osuka alagepa kavake'mo akame huvo. Alagepa kava'mo nehaya vaya'mo Goti vaya'amo mai'nage'a hosu kava'mo nehaya vaya'mogimo Goti'a o'age'nae. 12Muki vaya'mogimo Nemitiliyasi agi'ale'mo ali'a asaga hu'a ne'atae. Goti lama ge'a'e'mo ani kava huno agi'ale'mo alino asaga huno ne'ate. Lagae'e'mo ageteta ha maeta faigoko gemo nehune. Kagaemo faigoko getie'mo lama gemo nehae, huka afi'nane.Ge atupa gemae
13Asole gemo kaha paigefe'mo nehuvana avo kaesuva yafe'mo o'nahaiye. 14Nagaemo aise afina'mo kagaetegamo u'na la'augosamo alita'a magoke hisu'afe'mo ne'nahaiye. Kaipamo'mo falu hino. Lao vayatimogimo ge kamamae'nae. Muki lao vaya'aife'mo ge apamamao. He, lama ge.
Copyright information for
KYG